જીવનજ્યોત જગાવો : સુન્દરમ્

જીવનજ્યોત જગાવો

પ્રભુ હે, જીવનજ્યોત જગાવો,

ટચુકડી આ આંગળીઓમાં ઝાઝું જોર જમાવો,

આ નાનકડા પગને વેગે ભમતા જગત બનાવો,

અમને રડવડતાં શિખવાડો.  ( ૧ )

વણદીવે અંધારે આંખે તેજ ભરાવો,

વણજહાજે દરિયાને તરવા બળ બાહુમાં આપો,

અમને ઝળહળતાં શિખવાડો.  ( ૨ )

ઊગતાં અમ મનનાં ફૂલડાંને રસથી સભર બનાવો,

જીવનના રંગો ત્યાં ભરવા પિચ્છી તમારી ચલાવો.

અમને મઘમઘતાં શિખવાડો.  ( ૩ )

ઉરની સાંકડલી શેરીના પંથ વિશાળ રચાવો,

હૈયાના ઝરણા નાનાને સાગર જેવું બનાવો,

અમને ગરજતાં શિખવાડો.  ( ૪ )

અમ જીવનની વાદળી નાની આભ વિષે જ ઉડાવો,

સ્નેહ-શક્તિ-બલિદાન નીરથી ભરચક ધાર ઝરાવો,

અમને સ્થળસ્થળમાં વરસાવો.  ( ૫ )

— સુંદરમ્
વસુધા ( ૧૯૩૯ )

સ્રોત કુમાર ( અંક ૧૩૩ ) : પ્રથમ વીસીનાં કાવ્યો : પૃષ્ઠ 60
પ્રકાશક : કુમાર કાર્યાલય લિમિટેડ , વર્ષ : 1991

જીવનજયોત જગાવો : સુંદરમ્ : : સ્વર અને ઢાળ : હર્ષિત ત્રિવેદી : : યુ ટ્યુબ રિલીઝ ૨૫ / ૯ / ૨૦૨૪ : : અહીં નીચે ક્લિક કરીને સાંભળીએ : : : : https://youtu.be/bcrryDn-aJY?si=uvYdK_saxipxCr0a

જીવનજયોત જગાવો : સુંદરમ્ : અર્થ નિર્દેશ આસ્વાદ કાવ્યાર્થ વિચાર વિ જયરાજ પૂણે ઈન્ડિયા પેન્ડિંગ .. .